L-Għanja tal-Poplu 2006

Il-31 edizzjoni

Il-YTC din is-sena qed organizzat ukoll L-Għanja tal-Poplu Żgħażagħ fit-teatru tas-Salesjani f’tas-Sliema.

Riżultati

Il-Kanzunetta "Kyrie Eleison" interpretata min J Anvil fuq kliem ta’ Giovann Attard u mużika ta’ Augusto Cardinali, rebħet il-festival L-Għanja tal-Poplu – 31 edizzjoni li sar is-Sibt 13 ta’ Mejju waqt il-programm Showtime fuq PBS.

Fit–tieni post ikklassifikat il-kanzunetta "Dak Bla Ġlekk" bil-kantanta Isabelle, fuq kliem u mużika ta’ Augusto Cardinali.

Fuq lirika ta’ Paul Ellul u mużika ta’ Mark Spiteri Lucas, il-kanzunetta "Ġaħan Tibkix" kantata minn Julia Grima ġiet ikklassifikata fit-tielet post.

Il-premju speċjali għall-aħjar tema soċjali intrebaħ mill-kantawtur Walter Micallef bil-kanzunetta ‘L Malta, filwaqt li Isabelle rebħet ukoll il-premju għall-aħjar interpretazzjoni.

Is-sittax il-kanzunetta finalista kollha kienu ta’ livell għoli u s-serata kienet waħda mill-aktar pjaċevoli li nkludiet ukoll talent ieħor varjat b’tema Maltija. Dawk kollha li ma kellhomx l-opportunità li jaraw il-festival jistgħu jixtru double CD album li fih jinkludi wkoll il-Festival taż-Żgħażagħ. Is-Cd tinkludi wkoll ktejjeb bil-lirika kollha tal-kanzunetti u dawn jistgħu jinxtraw mill-ħwienet ewlenin tad-diski, jew mill-Y.T.C. stess bil-prezz speċjali ta’ LM6.50c

Jipprezentaw il-festival kien hemm Moira Delia u Manwel Xuereb.

Il-votazzjoni kienet imqassma hekk: 67% mill-ġurija esperta li kienet komposta min Frank ‘O Neill, Dr Frank Cassar, Tony Pace, Anna Borg Cardona, Trevor Zahra u Marthese Cassar. Il-kumplament tal-votazzjoni li kellha saħħa ta’ 33% kienet f’idejn il-pubbliku permezz tat-televoting.

Din is-sena wkoll il-Y.T.C. ta r-rikonoxximent Ġieħ l-Għanja li Tibqa’ lil Anna Borg Cardona u Profs Charles Camilleri, bħala apprezzament tal-ħidma kontinwa tagħhom b’risq il-mużika Maltija.