IR-REBBIEĦA TAD-49 EDIZZJONI TA’ L-GĦANJA TAL-POPLU

L-Għanja tal-Poplu ttella’ nhar is-Sibt 2 ta’ Awwissu fi Pjazza Teatru Rjal, fejn instemgħu s-sittax-il kanzunetta finalista akkumpanjati mill-Malta Concert Orchestra. Għad-49 edizzjoni ta’ L-Għanja tal-Poplu ġew sottomessi 124 kanzunetta oriġinali. Fil-finali r-rebbieħa intgħażlu minn ġurija professjonali flimkien ma’ ġurija popolari. Il-ġurija popolari kienet magħmula minn membri tal-pubbliku kif wkoll membri tal-Malta Concert Orchestra.

Il-kanzunetta ‘Moħħi Mistrieħ’ kantata minn Mark Tonna bi kliem ta’ Rita Pace u mużika ta’ Andrew Zahra kklassifikat fit-tieni post. ‘Moħħi Mistrieħ’ hija l-istorja ta’ missier ta’ tifla b’diżabbilita’ mentali li qed iħossu xjaħ u konxju li għad jasal il-waqt li bintu se tispicca mingħajru u għalhekk jinkwieta dwar x’ser jsir minnha.

Fit-tielet post ikklassifikat il-kanzunetta ‘Skuri u Ċari’ interpretata minn Mark Spiteri Lucas u Mark Micallef Costa. Iż-żewġ kantawturi jesprimu lilhom innifishom l-aħjar bil-mużika u b’mod partikolari bil-pjanu. Permezz tiegħu, setgħu jitkellmu dwar l-inżul (iċ-ċari) u t-tlajja (l-iskuri) tal-ħajja.

Il-premju għat-tema soċjali intrebaħ minn Peppi Azzopardi bil-kanzunetta ‘Għad Għandha Erba’ Snin’ b’ mużika ta’ Priscilla Psaila u interpretata minn Graziella Mifsud Schembri Vella. Il-kanzunetta hija dwar it-tifla Louijin li ħarbet fuq dgħajsa flimkien m’ommha u tilfet ħajjitha waqt it-traġit tagħha.

Cherylis ingħatat il-premju Enzo Gusman għall-interpretazzjoni tagħħa tal-kanzunetta ‘Inħobbok Wisq’ ddedikata lin-nannu tagħha – figura li kellha post speċjali f’ħajjitha u li t-telfa tiegħu ħalliet impatt kbir. Il-kanzunetta kellha kliem ta’ Emil Calleja Bayliss u mużika ta’ Peter Borg, Aleandro Spiteri Monseigneur, Matt ‘Muxu’ Mercieca u Cherylis Camilleri.

Il-kanzunetta ‘Ersaq ‘l Hawn’ rebħet il-premju ġdid mogħti mix-xandara. Il-kanzunetta li hija għanja Mediterranja bejn żewġ maħbubin, kienet interpretata minn Kayley Cuschieri fuq kliem ta’ Joe Julian Farrugia u mużika ta’ Philip Vella.

Daryl Jaymes rebaħ il-premju għall-kantawtur bil-kanzunetta ‘Aħfirli’ – kanzunetta li fiha nisimgħu tfajjel li mid-dell tal-innoċenza, jitlob maħfra lill-ġenituri tiegħu għaliex iħossu piż f’ħajjithom.

Il-kumitat organizzattiv ippreżenta l-premju L-Għanja Li Tibqa’ lil Joe Demicoli għall-kontribut tiegħu lejn il-kanzunetta Maltija. Joe interpreta il-kanzunetta tiegħu ‘Meta Għidtlek’ fuq kompożizzjoni ta’ Philip Vella u ‘Il-Maltin’ fuq kliem u mużika tiegħu stess.

Publikazzjonijiet:

L-album L-Għanja Tal-Poplu 2025 (Id-49 Edizzjoni) huwa ppublikat fuq diversi pjattaformi diġitali
fosthom Spotify, YouTube Music u oħrajn.

L-Għanja tal-Poplu huwa organizzat mill-għaqda volontarja L-Għanja tal-Poplu
bil-kollaborazzjoni ta’ Pjazza Teatru Rjal.
L-Għanja tal-Poplu huwa megħjun mill-Kunsill Malti Għall-Arti.

L-Għanja tal-Poplu huwa organizzat mill-għaqda volontarja L-Għanja tal-Poplu bil-kollaborazzjoni ta’ Pjazza Teatru Rjal.
L-Għanja tal-Poplu huwa megħjun mill-Kunsill Malti Għall-Arti.